紐西蘭 100% Pure 遊學之旅 (5) -- Auckland 編

         

由 Waitomo 上路由南至北大概 2 小時車程。由單線行車變成雙線行車，再變成 8 線來回, 終於來到Auckland , 紐西蘭中最大的商業和工業中心，特別之處，最主要是兩面環海，絕佳的避風港， 所以紐西蘭許多市民都擁有自己的船隻，而船與人的比例是全世界最高的城市。而且岩岩係兩年前歷史性的贏得美洲杯帆船大賽，從此之後便擁有帆船之都的美譽。今天會入住這裡其中一個具有代表性的地方，Sky City Tower，它位於Auckland 的市中心，係南半球最高的建築物，所以第一次楂車進入Auckland 就不費吹灰之力找到它了，Sky City 的娛樂設施非常齊全， 低層係五光十色的Casino，頂層係 360 度的旋轉餐廳，特色是由38mm 的安全玻璃所組成的地面， 你可以由上望下去有200m 高度。佳因三個月來都沒去餐廳吃飯，所以就“豪”一次，Book 佐呢間餐廳吃晚餐，同時可以從不同方向免費欣賞整個城市的美麗夜景。       

Auckland 夜生活不算多，除了酒吧就是看Table Dance，這裏看脫衣舞只收幾十蚊港幣入場費，裏面跳舞的女郎都非常專業，她們主要收入就是靠客人把紙幣塞入她們的各個“重要部位”但因為裏面看 show 的人大部份是內地同胞和學生，看的人多但打賞就欠奉。 

第二日早上我們先到了唐人街飲早茶，幾個月未食過港式點心，其實真係好掛住香港的野食！之後緊系要去試試坐帆船出海，我們參加了一個遊覽 Auckland  海港的帆船 tour，雖然帆船不大，總共只得4 個乘客但楂船的就有3 人，船長一開船就講到紐西蘭贏得美洲杯的威水史，然後逐一介紹泊在岸邊的比賽帆船。到了海中心就告訴我們如何把帆打開，嘩！原來船桅好危險，隨時會把人“打”落海，帆打開後速度馬上加快。一邊吹著海風，一邊欣賞 Auckland 四面海港的美景，Sky Tower, Auckland 大橋，一隻隻大小帆船佈滿其中。感覺非常寫意！最後船長更比我控制整隻帆船，在轉彎既時候成隻船完全傾斜，可想而知真正比賽時有幾刺激！

                   

黃昏的時候再楂車去 Mount Eden (One Tree Hill)，呢度係以前 Auckland 49 個火山口碩果僅存的遺跡。其餘的火山口已被移平填海，只剩低這個死火山讓人眺望整個城市，火山口已經成為草坪，風很大，但藍天白雲加海景加草香。紐西蘭的大城市比我們的郊外還清新的多。

紐西蘭 100% Pure 遊學之旅 (4) -- Waitomo 編

終於要說聲再見了Rotorua, 時間雖短, 卻滿載了數之不盡的美好回憶, Dream House, 開滿鮮花的花園, 清蔥的草地, 婆娑的樹影, 煙霧迷漫的地熱, 歡樂的笑聲, 熱情的款待, 美味的晚餐…………己成為我人生一段開心難望的片段, 難分難捨的情景再次出現, 道別了我的Home Stay Jenny & Tony, Home Mate Jaket & Ichoi, 依依不捨的感覺好快被期待而久的興奮心情取代而之. 因為我的好朋友Partner從香港，同我一起去發掘南北島。 就咁樣我地又踏上了另一段更精彩的旅程!

在紐西蘭楂車我相信係絕對適合, 安全, 方便, 同路線清晰, 最大的優點當然係可以按照自己的喜好用以最短的時間安排最好的行程. 所以我Partner已在Auckland Airport 租佐一架Nissan Pulsar 1.6, 由於租車公司不容許從北島楂車去南島(經汽車渡輪)的關係, 因此係北島只租佐五5日, 因為是上網找到的小公司, 平均每日連保險及Unlimited Milage 都只系HK$250左右, 足足平佐40%.

 第一站出發係晨光初露的零晨5點鐘楂車去Rotorua鄰近的景點Waitomo Cave, 車程大概一個多小時, 清晨的感覺, 空氣特別的清新, 令人為之一震,  煙霧籠罩住四周寧靜的小鎮, 更加撲朔迷離, 仿如置身仙境, 途中為佐節省時間, 路經了一個森林同湖泊, 係人煙稀疏的路旁, 不時有些小動物穿越馬路兩旁, 令人膽戰心驚. 車速不其然地減慢. 到了Waitomo Cave, 憑 YHA 證可以換取一個早餐， Muffin & Coffee.食完一個暖笠笠的早餐之後，就換一套潛水衣，水boot, 一個有燈的頭盔同大水泡。出發之前有個簡單的Briefing ，Warm Up 同 Demonstration，上了車後就出發去山上的洞口了。

   

Waitomo Cave是世界八大自然奇景之一， 主要是漆黑一片的洞穴裡布滿了千千萬萬的營火蟲(Glooming Worm)，而要睇到呢段奇景就要先拎住個大水泡走入只容許一個人穿過的洞口， 而當日的隊伍包括兩位導遊總共十個人，打開頭上的射燈一起沿著凹凸不平的路鑽入洞裡，經過三十分鐘後，見到一條地下河流，涉水而行，因為睇唔到水底的石頭， 所以路越來越難行，而且不時要爬高或跳到水裏，導遊已不段提醒我地陷阱所在，但我Partner一唔小心已扭傷左腳，雖然很危險，但心裏面卻覺得越來越刺激，不知走下去還有什麼驚險事情發生。其中有個地方導遊更須要我們把水泡放在身後，反身從高處跳到水裏面，哇！其他鬼老紛紛噗通噗通跳了過去，我是最後一個，噢！真囉命！

   

過了這關，水已經浸到腰部，要坐在水泡上才能飄浮前進，現在我們才開始了著名的 Black Water Rafting, 水流本來很慢，但過了幾個彎後就越來越急，而且地下水非常寒冷，感覺就像在黑夜漂流，沒有之前甘辛苦但速度加快了，比在水上樂園玩的不知刺激了多少倍，到了水流減慢的時候，導遊突然要我們關掉頭頂的燈然後趟在水泡上往上望，此時洞內完全漆黑, 申手不見五指, 過佐一陣, 眼睛慢慢看到洞頂有點點燐光， 就像身在太空中看著銀河星星在閃爍，營火越來越多，形狀好似一支支的吊燈，世界上境然有甘既奇景! 這裡既營火蟲和香港會飛的不一樣，其實呢種螢火蟲係當地一種昆蟲的幼蟲，因為係洞裡面有潮濕而寒冷的環境，而且位置非常曲折和深入, 蝙蝠和雀鳥無法進入, 沒有了天敵，剛好適合幼蟲的生長，才造就佐呢個世界八大奇景之一。最後我們隨著河水飄出洞外， 完成了三小時的壯舉。

紐西蘭 100％ Pure 遊學之旅 (3) -- Study 編

        重返校園的生活令我重拾返學做生無優無慮的感覺! 每日課程都在輕鬆愉快的氣氛下度過, 老師們也盡量以活動式的教材配合,令學生更加有興趣參與一些學校的活動! 最難望的當然係聖誕前夕的 “Christmas Play” 耶穌誕生的故事!而我竟然在過百位同學當中被選中去飾演一位主角 ---- 偉大慈愛的角色 “聖母瑪利亞” ! 嘩 ！ 好興奮好開心呀! 在演出前密鑼緊鼓的排練，令我們很有默契去掌握和配合每個角色既需要, 使正式的演出時贏得熱烈的掌聲和歡呼聲!

 

  

     在聖誕節那天， Jenny的女同孫女係澳洲專程返來慶祝, 享受天輪之樂, 我們也互相交還了聖誕禮物! 佢地係屋企搞佐個Christmas Party同小型的自助Buffet, 更邀請佐幾十位朋友一齊歡度聖誕. 有Ｄ來賓仲帶佐自製的甜品一齊分享.對於我來講當然好開心和難忘, 因為始終第一次係外國過聖誕, 體驗和感受到西方人濃郁和熱鬧的節日氣氛!

 

         學校的老師也有來自美國, 加拿大, 英國或紐西蘭, 佢地非常好客同熱心, 記得有位當地老師邀請我們到佢屋企玩, 參觀佢果度的Farm, 因為個Farm主要養羊和牛, 每日可生產有大量的新鮮羊奶, 當我企係個山頭上, 睇見佢用幾隻狗去驅趕數千隻羊時, 整個綠色草原被羊群掩蓋, 場面非常之莊觀和難得一見.我仲被Ｄ同學拉去飲新鮮羊奶, 新鮮的程度係直接企係隻羊的Pat Pat後面, 用手渣住羊乳, 將Ｄ奶直接 “擠” 入口中, 當時我見到羊Pat Pat 果度仲好多 “黃金”

, 其實真係好勉為其難咁行過去試, 不過唔試還好, 一試就大件事, 嘩 原來係羊身上直接飲Ｄ奶真係好暖, 好香, 好甜同好純, 仲一點騷味都無添, 好正呀! 係現今乜野都大量加入人工香料和防腐劑的社會來講, 飲到甘新鮮的味道和感覺真系好難得, Ｄ羊奶仲可以用來加入其他食品當中, 以加強食物的營養和味道。 老師間屋超過一百年的歷史, 但依然保持完整和古色古香. 我們係後花園裡用鮮奶喂羊ＢＢ, 同Ｄ朋友打排球, 當然仲有豐富的晚餐同一位識自彈自唱來自西班牙的靚子為我們高歌幾曲! 簡直系人生一大享受!

        學校每個星期六都有個Farewells Party歡送畢業生, 一首非常動聽扣人心弦的校歌, 令每個人臉上都有種難捨難分的感覺, 互相擁抱依依不舍的情景每次都令我好感動呀! 真系唔想下次Farewell 既主角系我哦……

 

         正所謂開心不知時日過, 時間飛逝, 三個月的留學生涯轉眼間就要結束, 真係好唔捨得呀……心中不其然有種失落的感覺, 在VISA還淨二個星期的時候我就在考慮究竟留下讀埋個Ｄ課程, 還是去紐西蘭其它未去過的地方遊覽見識??? 我問佐好多位同學的意見, 大部份都叫我不如去南島繼續體驗更Pure 既New Zealand , 或者會讓我從其他角度更了解這個國家! 就咁樣, 我就踏上了去征服南北島的旅程…………

除夕夜 Buffet

今年除夕夜係萬麗海景食Buffet, 果度最出名就是海鮮長腳蟹, 一去到第一時間急不及待試下, D蟹仲帶有咸海水味, 使味道可以保持得原汁原味, 但美中不足係隻蟹腳細佐小小, D肉唔夠多,冇果種啖啖肉的感覺. D Boston龍蝦, 壽司魚生都算新鮮! D 熟既野食同甜品就不過不失,(雪糕係Haagen-Dazs)  反而覺得D海鮮湯麵有些選擇, 除佐普通果D豬牛羊雞魚同菜之外, 仲有龍蝦, 象拔蚌, 而湯底也都有木瓜紅棗, 四川麻辣, D米線好彈牙添!至於價錢也都合理, 大除夕都係$358 加一, 整體來講都有75分架!

講開又講,同上年澳洲Marriott 酒店果餐Buffet比就遜色不少, 除佐價錢一樣, 其餘的海鮮品種真係多好多, 淨係食茄菲蟹都抵返晒(係外面D餐廳食要差不多成千蚊一斤)阿拉斯加長腳蟹, 老虎蝦, 澳洲大泥蟹, 青口, 帶子, D蠔雖小但好鮮甜, 唔鐘意蠔的我也忍不住一口氣食佐7隻咁多,  

有D食完都唔知係乜!不愧為真正的海鮮Buffet, 食過返尋味, 唸返都想再食多次!

平安夜

Silence night happy night………….平安夜, 去了油麻地一間Vegetarian Restaurant 食晚餐, 雖然不是咩大酒店, 但的野食同味道都唔錯! 其實香港人真是好幸福, 可以食到咁好味的素食, 感覺同食葷的味道一樣, 而且仲有好多款不同菜色選擇. 之後去佐尖沙咀睇燈飾, 成條街人頭湧湧, 每個人手上都拿住部相機不停的忙緊影相, 可能香港的經濟真是好佐好多, 見到每個人的臉上都有開心燦爛的笑容, 爭先恐後的企係聖誕樹同燈飾下影相, 坦白講尖沙咀的燈飾年年都差不多一樣, 冇乜特別之處, 可能香港實在太小, 去街湊熱鬧自燃成為節目之一, 唔到九點, 成條街己被封鎖晒, 人睇人, 人逼人,不過 D氣氛比往年真係好好多! 條路真係好長, 行到腳都軟 , 都係覺得係屋企舒服D

紐西蘭 100％ Pure 遊學之旅 (2) -- Rotorua 編

 

學生的生涯始終是簡單而樸素, 每天早餐鮮奶,Toast, 同四五種不同的果Jam, 方便快捷. Lunch大多數係公仔麵加生果或帶一些自備飯盒, 晚餐是一天之中最開心的時刻, WHY ??? Jenny的廚藝實在Ichiban, 她可以用Oven連續兩個星期煮出不同的菜式, 水準簡直可比美於香港的意大利餐廳, 一個簡單的Potato Smash (薯蓉) 加奶加黑胡椒已經不同凡響, 每次都有衝動問她拿每道菜的Recipe . 之後想在香港大顯身手煮D正宗的西餐.  我們一台五個人一邊品嚐美味晚餐,一邊暢所欲言, 時而開懷大笑, 在一個非常融洽的氣氛和舒适的環境之下, 就像一家人一樣無分彼此, 溫馨快樂. I enjoy it so much! 晚餐後, 我同Home mate一起去附近散步, 每次走在馬路上, 經過路邊兩旁的House院子裡開滿鮮花和掛滿果實的大樹, 但唔知點解, 可能是房子太大, 真是好難見到屋裡的主人和聽到屋裡發出的任何聲音,就好像是一間丟棄了的房子般出奇的寧靜, 連馬路上來往的車輛也少之又少.好像一幅幅油畫呈現在你眼前, 令人遠離煩擾! 心靈平靜! 原來人可以活得如此簡單而快樂, 平凡而充實! 我想這也許是許多人夢想的退休生活方式吧! 在香港雖然擁有豐富的物質生活, 吃喝玩樂, 但沉重生活的壓力令人筋疲力竭, 找個喘息的機會來放鬆自己只有打麻將, 唱K, Massage 等!  要享受這份世外桃源的寧靜和找到一些做人的目標! 恐怕就要離開香港, 找個自己最想去的地方HEA, 放鬆和平衡自己………….

 

學校裡的學生不多, 大多數來自日本, 韓國, 中國, 泰國, 更有一些歐洲, 南美洲和鄰近地區的人, 像Basil & Caledonia等. 更有些來自日本的同學是因為退休後, 才有機會選擇喜歡地方完成遊學的心願. 正所謂先知先覺, 後知後覺, 學無止境, 做到老學到老是我們終生學習的積極態度.

雖然每班的學生來自五湖四海, 但我們很快就打成一片, 互相交流, 建立了良好的關係. 我們每天返學的交通工具主要是踩單車, 乘Bus, 或由Home Stay 接送. 記得我到Rotoura的第一個星期六同Jakie去Town Shopping, 因沒有任何的交通工具, 要步行來回用了五個多小時才回到家裡, 哈哈哈! 這個教訓令我體驗到在外國冇車就等於沒有腳一樣寸步難行, 想去邊都唔得, 所以返到香港當然是第一時間就考車牌啦哈哈哈!

 

學校每到周未就會有戶外活動, 而Rotorua 的景點也非常之多, 有90%地熱的 Thermo area到處都充滿了硫磺味, 煙霧瀰漫!  Museum, Rainbow Farm , Whakarewarewe, 數之不盡………

       

Lake Taupo 是非常出名的景點, 也是Bungee Jump的發源地, 要從二十多層高的平台跳下去直插水中我相信需要很大的勇气, 甚至覺得是一種被虐待的心態! 心中有幾秒鐘的衝動, 但卻被理智戰勝了…心態未Ready, Next Time! 而我去得最多次的一個地方就是Rotorua Lake, 每次放學後都會同D同學來到這裡, 坐在草地上一邊欣賞湖光山色, 一邊交談, 最開心的是有一群群的黑天鵝在湖中向你遊過來, 好似識聽你講野, 不斷搖頭擺尾!

 

紐西蘭 100％ Pure 遊學之旅 (1) -- Preparation 編

New Zealand The Most Beautiful Mother Nature In This World !

去外國遊學讀書係我由小到大的心願，三年前（2002年 11月），終於如願以償，把握佐呢個千載難逢的機會，去紐西蘭的北島羅托魯瓦（Rotorua）遊學了三個月。時間雖短，卻給我的人生留下一個難能可貴的保貴經驗和美好回憶！

其實要確定在出來社會工作這麼久之後放棄一切，去完成心願，一定要有很大的推動力和決心。 在网上其實已經了解到一些短期的英語遊學課程， 世界各地都有，但價錢就相差非常遠，就在2002年的十月份， 自己鼓起勇气跑到學聯旅遊查詢，英語國家當中，澳洲和紐西蘭剛好是夏天， 由於我怕凍，澳洲也在98年的時後去過， 紐西蘭就成為我首選的目的地，當然紐西蘭被認定為世界上最美麗的國家，能夠在那裏完成我心中的夢想，自然難以抗拒。北島羅托魯瓦（Rotorua）我從來沒聽過, 她比奧克蘭(Auckland) 和基督城 (Christchurch) , 更 “RAW”更神秘 , 我最後選擇了她…. 搞學遊除了定目的地以外, Home stay , 機票和簽證都要好好安排, 最後我確定先去3個月, 簽證可以，機票買了張新西蘭航空一年票，成9000蚊（近聖誕和新年），好肉痛，學費和 Homestay（系點環境都未知）要8000蚊一個月。噢最平既啦！

紐西蘭由南北島組成，人口大概400萬，係世界上人口密度分佈最低的國家。羅托魯瓦是紐西蘭北島最受歡迎的旅遊度假勝地。城市周圍有許多美麗的湖泊和森林，而最為著名的是熱礦泉浴池。

 

 

 

Rotorua English Language Academy該校學生來自世界各地，但主要來自亞洲及歐洲。學校位於Rotorua湖東岸，風景秀麗，距離Rotorua市中心只有10分鐘車程。而我就住係當地的Home Stay真真正正的體驗了所謂外國人的生活模式。記得到Auckland機場果日，心情非常的緊張和興奮，就連張入境表都填漏左。出了關口不停的搜索學校的接待人，見到Rotorua招牌仔，好開心咁走上去簽名報導，已經有二個日本靚女係到等佐好耐，閒談中知道她們只有二個星期的 時間逗留係到，嘩！好勇亞！絕對唔放過任何機會。從機場到Rotorua大概400公里，車程4小時，但由於當時的交通大塞車，到達Home Stay 時已差不多係晚上九點鍾。當架車駛入Rotorua時 (Thermal Area) 己聞到好大的硫磺味。 Jenny & Tonny一對非常熱情好客的夫婦已企係門口迎接我！當我踏入門口第一眼睇到呢間大屋時已按捺不住興奮的心情！嘩！好靚亞！My Dream House！四房一廳包括平台，花園及車房大概4000呎，小橋流水，成間屋被茂盛的樹木和鮮花包圍住，一陣陣清香的草叢樹木味道扑鼻而入！果然係100% Pure New Zealand ! 同屋的兩個Home Mate 福建人－Jackie, 日本人－Chiho,好快的打成一片，成為好友。

第二日早上Jenny楂車送我返學校，做左個水平評核試, 根據成績分配不同的班級。在場有來自不同國籍的學生，我隔離坐住兩個50幾歲的日本中年女士，非常有信心的應付考試，最後我被安排為Upper Intermediate I ( Level), 開始佐我學習的旅程。